ستەمكاری پێش ئەوەی كردەوەیەكی سیاسی، سەربازی و یاسایی بێت، بیركردنەوەیە، پەیوەندی مرۆڤە بە ئەویتری جیاوازەوە، بۆیە ئەوەی ڕوودەدات دەركەوتەی ئەم ساتە مێژووییە نییە، قووڵترە، گوزارشتی ئەو بیركردنەوە و ڕۆحە ستەمگەرەیە لە سەرەتا و بنچینەوە پارتی لەسەر دامەزراوە، گوزارشتی ئەو خواست و هەڵپەكردنە ڕیشەییەی بنەماڵەیەكی سیاسییە، كە هەر نەیانویستووە نە تەنیا لە ڕووبەری سیاسیدا ركەبەریان هەبێت، تەنانەت لە ڕووبەری كۆمەڵایەتی و خێڵەكیشدا هەتا بۆیان لوابێت دەرفەتی دەركەوتنی هیچ بوونێكی جیاوازیان نەداوە. جیاوازی بۆ ئەقڵی خێڵی سیاسی و سیستمە ستەمگەرەكان تاوان و كوفرە. تاوان و كوفریش لە یاسای بە میزاج جێبەجێكراوی ئەم سیستم و ئەقڵە ستەمگەرەدا سزای هەیە و بەو شێوەیە ئەنجامەكەی دەبینین.


چەسپاندنی حوكمی بێ بنەما و نایاسایی و نامرۆڤانەی سەر ڕۆژنامەنوس و چالاكوانانی بادینان تەنیا ڕەهەندێكی یاسایی نییە، تەنیا هەنگاوێكی نادادپەروەرانە و شكاندنی یاسا و بنپێخستنی مافەكانی مرۆڤ نییە، زیاتر و ترسناكتریشە لەوانە، كردەوەیەكی ستەمگەرانەی سیاسی ڕادیكاڵە، خۆیەكلاكردنەوە و ڕوونبوونەوەی تەواوەتی نیازی ئەو دەسەڵاتەیە نەك تەنیا بۆ ڕۆژنامەنوس و ئازادیخوازانی مەدەنی و بێ دەسەڵات، زیاتر لەوە هەنگاوی سیاسی دوژمنكارانەی ڕیشەییە بەرانبەر ئەو دەنگ و هێزە سیاسییانەی لە ڕووبەری كوردستاندا هەن و هەندێجار ملەجیڕێیەكی پارتی دەكەن، ویستێكە دەیەوێت زیاتر بڕوات، دەیەوێت بیگەیەنێتە سەر مۆخ، هەڵبەت ئەمەش وەك هەر دەسەڵاتێكی تۆتالیتار و ستەمگەر، كە دەیەوێت تا دوا پنت بڕوات لە چەسپاندنی خۆی و داخستنی پەراوێزە بچوكەكانی ئازادی دەربڕین و خۆبەیانكردنی كەسی و دەستەجەمی فەرهەنگی و سیاسیدا.


چەسپاندنی سزای زیندانیكردن بۆ چالاكوانان و ڕۆژنامەنوسان نییە، ئەوەی دەیبینین یەكێك لە ڕووەكانێتی، ئەوەی بۆ دەسەڵاتی ستەمگەر گرینگترە دیوە ڕەمزییەكەیەتی، ڕەمزییەتی ئەو سزا ستەمگەرانە و نامرۆڤانەیەیە، كە ئامانجی هەموو دەنگەكانی تری كۆمەڵگەیە، ئامانجی پارتە سیاسییەكان و ئەو بەرپرسە سیاسی و حیزبییانەیە ئەگەر لە ڕووبەرە ڕووكەشە سیاسییەكەشدا بێت بانگەشەی نەیارێتی و ململانێی پارتی و بنەماڵە فەرمانڕەواكەی دەكەن.


سیستمی ستەمكاری فەرمانڕەوای وڵاتەكەبووە، هەتا ئێستا بە ڕێژەیەكی فراوان لە دەرەوەی یاساوە چەوسانەوە پیادەكراوە، هەڵبەت نەك لەبەرئەوەی نەیانویستووە ستەمكاری بەتەواوی لە فۆرم و چوارچێوەی یاسادا ڕێكبخەن، بەڵكو بە هۆی ئەوەوە بووە هەر خودی سیستمە فەرمانڕەواییەكەی هەرێم هەتا ئێستاش ناوەرۆكێكی هەڕەمەكی و میزاجی نیشانداوە و نیشاندەدات. ئەوەی لەم كردەوەیەدا، ئەوەی لەم هەنگاوە دوژمنكارانە ڕادیكاڵەی ستەمكارییەدا پێویستە لە ڕەگەوە ڕابچڵەكێ تەنیا مرۆڤی ئازادیخوازی بێ پشت و پەنای ئەم كۆمەڵگەیە نییە، بەڵكو ئەو كاراكتەر و هێزە سیاسییانەیە هەنوكە بەشێ لە گۆڕەپانە سیاسی و حوكمڕانییەكەی هەرێمیان بە دەستەوەیە، چونكە ئەم حوكمە حوكمدانی ئەوانە نەك تەنیا كۆمەڵێك مرۆڤی غەدرلێكراوی ئازادیخواز.


یەكەم، ئەم كردەوە ڕادیكاڵییە بێباكانەیە دەبێت لەلای پارتە سیاسییەكانی دیكە بە جیددییەتەوە وەربگیرێت و، بەرگرتن بە گواستنەوەی نیازە ترسناكە ستەمكارییەكەی پارتی و بنەماڵە فەرمانڕەواكەی دەبێت بە هەمان جیدییەتەوە مامەڵەی لەگەل بكرێت. ئەمە واتای ئەوە نییە ئەو هێزە سیاسییانەی دیكە توانیویانە لە جەوهەردا دابڕان لە فەرهەنگی ستەمكاریی و بیری خێڵایەتی-بنەماڵەیی دروستبكەن، بەڵام یەكلابوونەوەی شتەكان بە قازانجی نیازی ستەمكارانەی پارتی دۆخی ژیان و ئازادی و مرۆڤ بە گشتی خراپتر، ترسناكتر و خوێناویتر دەكات.


دووەم، گەڕانەوەی ئینسانی ئێمەیە بۆ تەماشاكردنەوەی خۆی، بۆ ئەو كەلێن و بۆشاییە هزریی و ئەقڵییانەی تێیدایە و بوونەتە جێ و خانەخوێی بەندایەتی سیاسی، بوونەتە شوێنی ڕەوایەتیدان بە سیستەمی ئاغا و كۆیلەی سیاسی، بوونەتە پێگەی جێگرتن و مانەوەی ئەم فۆرمە ستەمگەرە دواكەوتووەی دەسەڵات. بیركردنەوە لە بنەما هزری و ئەقڵی و كۆمەڵایەتیی و سیاسییەكانی ستەمگەری تەنیا بیركردنەوە نییە، یان هەڵوێست نییە لە ساتێكی دیاریكراوی كورتخایاندا، پرۆسەیەكی قووڵ و فراوانی خوێندنەوەیە، دەرفەتدانە بە خودی خۆمان لە ڕێگەی خوێندنەوەی كتێبە گرینگەكانەوە، لە ڕێگەی خۆپەروەردەكردنی فیكرییەوە بۆ ئەوەی ڕادەی تێگەیشتن لە ستەمكاری و جۆرەكانی دەسەڵات بە شێوەیەكی تەندروست و قووڵ لەناو خۆمانەوە دابمەزرێنین. ستەمكاری لە هەموو فۆرمەكانیدا لەناوەوەی خودی مرۆڤەوە دەكوژرێت، چەكی یەكەمی كردەوەی كوشتنی ستەمكاری مەعریفەیە، مەعریفەی دژە ستەمكارییە. ستەمكارانی كوردستان بچوكتر و گرگنترن لە هەرچی ستەمكاری خۆرهەڵاتە، تەنانەت بەردەست و شاگردی شانەكز و سەركزی ستەمكارانی خۆرهەڵاتن.

بابەتی زیاتر

سەرجەم مافەکانی پارێزراوە KNA . Copyright 2020 - Knanews.net ©