من نازانم پیاوانی ئاسایش‌و هەواڵگری هەرێم شەوی کەوتنی درۆنەکەی فڕۆکەخانەی هەولێر چۆن‌و چەندیان ئاگادارو چەن لەخەمی هەولێرو هەرێمەکەدا بون، بەڵام ڕۆژانی دواتر دەرکەوت کە هەمویان کەمتەرخەم‌و خەمساردن، وەک هەر ڕوداوێکی تیرۆر یان تەقینەوەی ئاسایی وەریانگرت‌و وێڵیانکرد، حکومەت‌و حیزب‌و پەرلەمانیش بەچەند وتارو بەیاننامەیەکی سەرکۆنەکردن تفی خۆیان کردو ڕۆیشتن، هەموو ئەوانەش کە لەبەرژەوەندیان بوو بەبکەرەکانیشەوە بەکەریمی تێپەڕین. 

ئێمە چیمان خوێندەوە!؟ دوای ئەو ڕوداوە چیتر!؟
ـ هیچ کەس‌و دەزگاو شوێنێک لەهەرێم ئەمین نییەو ناتوانرێ لەهێرشی درۆنی دوژمنەکانمان بپارێزرێ .
ـ ئاسایش‌و دەزگا هەواڵگرییەکانی هەرێم  نەیانتوانیوە‌و ناتوانن لەمەحکەمترین شوێنی هەولێر کە فڕۆکەخانەیە، ڕێگری لەکاری گروپەکانی هاوکارو پشتیوانی دوژمن بگرن، بەکەماڵی ئیسراحەت لەچەندین شوێنی جیاوازەوە، لەئان‌و ساتی تەقینەوەکەدا (وێنەی ڤیدیۆیی)یان گرتوەو بڵاوکردۆتەوە.

ـ  سەروەری‌و خاوەندارێتی هەرێمی کوردستان بەدەست هەر دەوڵەتێکەوەیە کە بیەوێت، کورد خۆی نەبێت .

ـ سیستەمی خۆپارێزی لەموشەکی زەمینی‌و ئاسمانی لەهیچ شوێنێکی هەرێمدا نییە .

ـ بیانییەکان، خاکی هەرێمی کوردستان‌و عێراق وەک سەرزەمینی خۆیان‌و مەیدانی شەڕی دوژمنەکانی خۆیان ئەبینن‌و پێناسە ئەکەن! هاوزەمان هیچ بیرو پڕۆژەیەکیان بۆ پاراستنی کوردو زامنکردنی مافەکانی کورد لەعێراقدا نییە .

ـ حەشدی شەعبی‌و چەکدارو بێ چەکی حیزب‌و لایەنە عێراقیەکان، لەجەنگ‌و شەڕی سەرزەمینی کوردستان چ دژی کورد بیکەن یان دژی هێزە هەرێمی‌و نێودەوڵەتییەکان بەشدارو ئاسودەو خۆشحاڵ ئەبن .

ـ کۆماری ئیسلامی ئێران، پیتاندنی یۆرانیۆمی گەیاندۆتە پلەیەکی باڵاو دەستی هەڕەشەی بۆ کۆمەڵی نێودەوڵەتی لەدەستی گفتوگۆی توندترو بەهێزترکردوە، نوێنەری وەزارەتی دەرەوەیان ئەمەی بەئاشکرا ڕایگەیاندوە. دەزگا دەوڵەتییەکانی تریشیان هەرێمی کوردستانیان لەسەرزەمینی برادەرو دۆستەکانیانەوە گۆڕیوە بۆ سەرزەمینی دوژمنەکانیان.

ـ تورکیە، جگە لەو ڕوبەرەی هێزەکانی خۆیان تیایدا، بەئازادی جموجۆڵ ئەکەن، هەموو ناوچەکانی تری هەرێمی کوردستان بەمۆڵگەی تیرۆریستان پێناسە دەکات .

ـ هێزەکانی ئەمریکاو هاوپەیمانەکانیان، بیر لەیەکلاکردنەوەی ململانێکانیان لەسەر خاکی عێراق‌و کوردستان ئەکەنەوە، نەخشەی خۆپارێزی‌و تەسفیەی نەیارەکانیان، سەرلەبەر گۆڕانکاری بەسەردادێت‌و هەرگیز وەک هەفتەی پێش درۆنە ئاگراوییەکە نابن .

هەمو ئەوانەو چیتر...؟
ـ ئەبێت دڕدۆنگی‌و ئاگاداری‌و هەتا هەڕەشەکانی هەرێم لەمڕۆوە ڕوو لەحوکمدارانی بەغدا بێت، نەک پەیوەندی‌و نامە گۆڕینەوەی موجامەلەو هاوسۆزی‌و پێکەوەیی ...

ـ بەئاشکراو ڕاشکاوی لەگەڵ گشت هێزە بێگانەکان، هەرێمی‌و نێودەوڵەتیەکان، لەسەر پاراستنی ماف‌و ژیانی خاک‌و خەڵکی هەرێمی کوردستان قسەبکرێت‌و پەیامی ڕون‌و ئاشکرایان پێبگەیەندرێ‌و دڵنیایی دەستەبەربکرێ، گەرنا! داوایان لێبکرێت ئۆردوی سەربازی‌و هەواڵگریان بپێچنەوەو هەرێمی کوردستان جێبهێڵن، نەتەوەیەکگرتووەکان‌و یەکێتی ئەوروپاش لەم پەیامە ئاگاداربکەنەوە.

ـ پڕۆژەی نەخشەو پاراستنی سەربازی ئەم نیوە هەرێمەی کە لەژێر دەسەڵاتی حیزبە کوردستانیەکاندا ماوە، بدرێتە دەست ئەفسەرەکانی ئەرکان لەوەزارەتی پێشمەرگەو بەپەلە دور لەدەستی حیزبەکان جێبەجێی بکەن .

ـ بەیاداشتێک تەواوی ماف‌و داواکارییەکانی کورد لەعێراقدا، بەدیاریکردنی سەقفێکی زەمەنی بۆ جێبەجێکردنیان، لەڕێگەی پەرلەمانی کوردستانەوە بدرێت بەحکومەتی عێراق.

ـ تەواوی وەزیرو کاربەدەستەکانی نوێنەرایەتی هەرێم لەعێراقدا بکشێنەوە تا جێبەجێکردنی ئەو یاداشتەی پێشکەشی بەغدا ئەکرێت .

ـ لەناوخۆماندا، حوکمڕانی هەرێم لەدەستی گروپێکی گەمژەو نەزاندایە، لەسەریاندراوەو ئەژنۆیان لەگەچ ئەگرن..! بێئاگان تەنانەت لەڕوداوەکانی ناوخۆی کوردستانیش کە بەئاگایان ئەهێنیتەوە، لەجیاتی سوپاس، جنێو بارانت ئەکەن!! وەک ساڵانی پێشوو، وەک دوێنێ‌و وەک ئەمڕۆش بەقسەو ڕاوێژی چەند دەڵاڵێکی بازاڕی نەوت‌و هەواڵگری نێونەتەوەیی‌و بەرژەوەندیخوازی ناوخۆ ئەکەن .!

كاردانەوەی ئەمکارە بەوان ناکرێ، شەڕ لەبەر دەرگایەو گەر بەو تاس‌و حەمامەی پێشوو بەردەوامبن، دیسان وەک بەڵاکانی پێشتر و وەک شانزەی ئۆکتۆبەر لەناوخۆدا، ئەکەونە جنێودان‌و پەلاماردانی یەکتری‌و دواجار ئەبێ بڵێین (بەڵا لەخۆتان).

بابەتی زیاتر

سەرجەم مافەکانی پارێزراوە KNA . Copyright 2020 - Knanews.net ©