لەنێوان فۆرم و شوناس گۆڕین لەکۆنگرەی ئەمجارەی کۆمەڵی ئیسلامیدا ،ناوەکەیان گۆڕی بۆ کۆمەڵی دادگەری، گەر وابزانرێت گۆڕین و لادانی پاشگری ئیسلامیی لە حزبێکی کۆنسەرڤاتیڤی وەک کۆمەڵ کارێکی ئاسانە ،هەڵەیەکی گەورەیە!! بە گۆڕینی ئەو ناوە واتە هێنانی شوناسێکی نوێ و گۆڕینی زۆرێک لە پرەنسیپ و میکانیزمەکانی کارکردنی ئەو حزبە، واتە چیتر ئەم حزبە موڵکی تەنها موسڵمانان نیە، بەڵکو مافی ئەندامێتی دەبەخشێتە مەسیحیەک، کاکەیی و یەزیدی و تەواوی پێکهاتەکانی تری خەڵکی کوردستان، واتە دەکرێت ژنێک و کچێکی بێ سەرپۆش و سترێج لە پێ و ڕێکپۆشێک وەک یەک بن،دەبێت کۆمەڵی دادگەری نوێ میکانیزمی نوێ لەمەڕ تێکەڵی و ئاوێتەیی ئەوەی ناونراوە دەعوە و سیاسەت بگرێتە بەر و هەڵنەگرتنی ئەم هەنگاوە پاشەکشێی بەدوادا دێت، کەواتە ئەم حزبە ئەبێ زۆرشتی بگۆڕێت.

بێگومان لە ئایندەیەکی نزیکدا کۆمەڵ ڕوبەڕوی تەنگژەو قەیرانێکی سەخت و دژوار دەبێتەوە، ململانێیەکی سەخت لەنێوان هێزە کۆنسەرڤاتیڤەکان و ڕیفورمخوازان( موحافزکاران ، ئیسلاح تاڵەبان ) سەرهەڵدەدات،دور نیە ببێتە پوازێک بۆلەت بونێکی تری ئەو حزبە،(ئەوەی گوتارە توندەکەی یەکێک لە توندڕەوەکان و باڵی بەهێزی کۆنسەرڤاتیڤەکانی خوێندبێتەوە کە لەپیجەکان بڵاو کرایەوە هەست بەم ڕاستیە دەکات) بەڵام فاکتی بەڵگەنەویست ئەوەیە، کۆمەڵ بەهۆی سستەمی پەروەردەیی پێگەیاندنی تاکەکانیان و کادیرەکانیان ،هەروەها مێنتالێتی زۆرێک لەسەرکردەکان هەرگیز ناتوانن هەنگاو لەگەڵ گۆڕینی ناویان هەڵگرن و شوناسێکی نوێ و گۆڕانکاری لە میکانیزمی کارکردنی ئەو حزبە بکەن، بەڵکو ئەو کارەیان تەنها گۆڕینی ناوە نەک ناوەڕۆک، فۆرمە نەک جەوهەر، لەم کارەشدا ڕیفورمخوازان لاوازن و ناتوانن داکۆکی لێبکەن و کۆنسەرڤاتیڤەکان سەرسەختانە دژایەتی دەکەن و شکستی پێدەهێنن.

چونکە مێنتالێتی تاکی کوردی موسڵمان سازو ئامادەباش نەکراوە ئەو شوناسە نوێ یە قبوڵ بکات و هەماهەنگی بێت بۆ سەرکەوتن، بێگومان و بەدڵنیاییەوە تاکەکانی تری جڤاتی کوردی بەگشتی هەرگیز بڕوا بەم شوناسە نوێیە ناکەن و وەک ماسکێکی سیاسی دەنگ کۆکردنەوەی هەڵبژاردنەکانی ئایندە مامەڵەی دەکەن و دەنگی پێ نادەن.بەقەناعەتی خۆم ،کۆمەڵ تەنها ناوی گۆڕیوەو هیچی تر.

هەمان مێنتالێتی و هەمان باکراوندی کارکردنە. دەبوو ساڵانێک لەمەو بەر حزبە ئیسلامیەکان ئەم هەنگاوەیان هەڵگرتایە، ناکرێت کاری سیاسی و حزبایەتی لە توێژێکی کۆمەڵگەدا وابەستە بکرێت و گوزارش تەنها لە خواستەکانی گروپێک بکات، بەڵکو دەبێت خێمە و چەترێک بێت تەواوی مرۆڤەکان بە جیاوازی دین و مەزهەب و ئایدیا و نەتەوەکانیان لەسایە و سێبەریدا کۆبکاتەوە،وەدی هێنەری خواست و ئاواتەکانیان بێت، کاری حزبی وەک ڕێکخراو و سەندیکایەکی پیشەیی نیە تایبەت بێت بە چین و توێژ و پیشەیەک!!!

دەزانم گروپە کۆنسەرڤاتیڤەکانی ناو ئیسلامیەکان بەگشتی لەم میانەدا زۆر حەز دەکەن هەر هەنگاوێکیان هەڵگرت دەبێت بگەڕێنەوە بۆ سەلەفی صالح و تەئصیل کردن، خاتریان بگرن و بڵێن لە ڕێکەوتننامەی حودەیبیە ، کە پێغەمبەر صلی اللە علیە وسلم لەگەڵ سوهەیلی کوڕی عەمر واژۆی کرد، سو هەیل زۆر چەمک و ئیدیۆمی ڕێکەوتنەکەی قبوڵ نەکرد (رسول اللە، بسم اللە الرحمن الرحیم) ئەمانەی گۆڕی. پێغەمبەریش کە لە پێگەی بەهێزیشدا بوو قبوڵی کرد ، چونکە دەیزانی و خوێندنەوە و دوربینی ئایندەیی بەهێز تر بوو . دەرئەنجام سەرکەوتن و فەتحی مەککەی بەدواوە بوو.کەواتە بە ڕیش نیە بەئیشە، دەبێت گرنگی بدرێت بە گۆڕینی میکانیزمەکانی کارکردن و میتۆدی پەروەردەیی کادیران.

سەرکردایەتی نوێی کۆمەڵی دادگەری دەبێت زۆرباش بزانن ئەم بەیداخ هەڵگرتن و ناو گۆڕینە ئاسان نیە، دەبێت شوناس گۆڕینیش بێت، نەیار و چاودێر و دۆستان هەموو زوومی کامێرەکانیان لەسەرتانە، ماوەیەک دەبنە بنێشتە خۆشەی دەمی ڕەوتی مەدخەلی و پاشان خورافەخوازان، هاوکات دوو حزبی ئیسلامیی بەرامبەرتان زومیان لەسەرتانە، ئەگەر سەرکەوتوبن ئێرەییتان پێ دەبەن، ئەگەر ژێرکەوتوبن دەبنە پەندێکی باش و مادەیەکی سیاسی گەرم کردن و هاندانی ڕێکخستنەکانیان. بێگومان حزبەکانی دەسەڵاتیش قسەی ئەمنی و تۆقاندنی خۆیان دەبێت.

وتارەکانی تری ئەم نوسەرە
یاسین ڕەسول عوسمان
سەما کردن لەگەڵ گورگ
یاسین ڕەسول عوسمان
کۆمەڵگەی شڵەژاو
یاسین ڕەسول عوسمان
هەولێر تەنها نیە!
یاسین ڕەسول عوسمان
دیارە بەغدا خۆشە !
یاسین ڕەسول عوسمان
کورد بوون و کوردایەتی
یاسین ڕەسول عوسمان
درۆ،دەروازەی بێ متمانەیی...
یاسین ڕەسول عوسمان
ڕیسکی زەنگی گەشتەکەی کازمی
یاسین ڕەسول عوسمان
خەمێک بۆ پەروەردە

بابەتی زیاتر

سەرجەم مافەکانی پارێزراوە KNA . Copyright 2020 - Knanews.net ©