ئەمشەو ۲۰۲۰/۱۰/۷ تەواو خوێندمەوە.

بەشی یەكەم
بڕیارمدا لەگەرمەی ژاوە ژاوەکەی لەمەڕ ئەم کتێبە ،نەدوێم و نەنوسم، بەڵکو پەلە نەکەم و ورد بیخوێنمەوەو ڕاو بۆچونەکان گەڵاڵە بکەم پاشان باری سەرنجم بخەمەڕوو. لە دەستپێکدا خستنەڕویەکی گشتی کتێبەکەنمایش دەکەین و دواتر خوێندنەوەو تێگەشتنمان بێ هەڵچون و پەڕگیری و تەرەفگیری ئەگەیەنین.


کتێبەکە دەڵێت ..خوێندنەوەیەکی جیاواز، ڕەخنە، لێکدانەوە، توێژینەوەی.۷ ڕشتەی سەرەکی لەخۆ دەگرێت.لە دوتوێی 732 لاپەڕەدا کەتالاپەڕە 457 نوسین و وەڵامدانەوەیە، پاشان کرۆنۆلۆژیای بەڵگەکان لەلاپەڕە 467 تا لاپەڕە 481 وتارەکان و لە لاپەڕە 488 تا 550 نامەکان ، لەلاپەڕە 552 تا 729 نامیلکەکان لە خۆ دەگرێت .لە تاران چاپکراوە.پێشکەشی کردوە بە کامەرانی سەید مەجید و هاوەڵ لەگەڵ 21کەسی تر لە شەهیدەکانی هاوڕێی و ئاڵای شۆڕش.


مەلا بەختیار دەڵێت: (ئەم کتێبە کۆ وەڵامی بەشێکی ئەو ڕەخنانەن لە سێ دەهەی ڕابردودا لە نوسینی بیرەوەریەکان و چاو پێکەوتنەکاندا باسکراون لە زۆربەشیاندا باسی کۆمیتەی هەرێمەکان و ئاڵای شۆڕش و بەندە کراوە، پشوم درێژ کرد خۆم ڕاگرت کۆرۆنا هەلی بۆ ڕەخساندم لەخەم بڕەخسێم، بەناو نوسەرو یاداشت نوسی تر هەبون باسیان کردوم نوسینەکانیانم بەشایەنی وەڵامدانەوە نەزانی، لەدوتوێی ئەم وەڵامانەدا وەڵامەکان ڕەخنەو گێڕانەوەکانی ئەوانیش دەگرێتەوە، دەمێنێتەوە بڵێم لەبری بیرەوەری بیرەوەریەکانی من نین، تەمەن یاربێ بیرەوەریەکانیشم دەنوسم) ل 462.


بەگوتەی نوسەر بەشی زۆری ئەم کتێبە وەڵامدانەوەی چەندین کتێبە و چڕە هەڵسەنگاندنێکە بۆ کتێبە وەڵامدراوەکانی وەک دیداری تەمەن مام جلال، لەکەناری دانوبەوە بۆ خڕەی ناوزەنگ، و، پەنجەکان یەکتردەشکێنن،،نەوشیروان موستەفا،،،هەڵۆسورەکانی قەندیل ،،فەرەیدون عەبدولقادر، چەپکێک لە مێژووی کۆمەڵە،،برایم جلال.


بەگشتی مەلا بەختیار زۆر تر وەڵام و ڕەخنەو توانج و سوکایەتی بە برایم جلال دەکات و پاش ئەویش نەوشیروان موستەفا، هەندێک گلەیی و ڕەخنەش لە مام جلال و ئەوەی ناوی ناون نەوەی یەکەم ‌(جەلالی و مەلایی) و پاشان نمایشی ئاشتیخوازی خۆیی و مەڵبەندی یەک لە پەلامارنەدانی شیوعیەکان و دواتر هەڵکوتانە سەر و گرتن و زیندانی کردنی ناڕەواو ناحەق بۆ سەر ئاڵای شۆڕش و کوشتن و دیل کردنیان ،بەبڕیاری پلینیۆمی دیسپۆزەتیڤ کە 60ئەندامی کۆمەڵە بەشداربون و بڕیار ئیعدام کردنی مەلابەختیاری تێدا دراوە، هەروەها ڕەخنەی توند و کوشندەی دژی یەکێتی نیشتمانی و زۆرێک لە هاوسەنگەرەکانی تێدایە و بڕیاری پلنیۆم بە بڕیاری فاشیەکان دەچوێنێت . لەهەندێک بڕگەدا ستایشی هەندێک هاوەڵ و سەرکردەی یەکێتی دەکات و هاوکات لەگەڵ ڕەخنەکاندا ستایشی هەندێک خاڵی پۆزەتیف و بەهیزی و کاریزمایی مام جلال و نەوشیروان موستەفا دەکات، سەرە ڕای سنوربەزاندنی ڕەخنەی سیاسی بەرامبەر ئەو دوو سەرکردەی یەکێتی ، دواجار دەڵێت ڕۆحی هەردوکیان شاد.

بەڵام پێ دەچێت برایم جلال زۆر زۆر ئازاری دابێت و ڕقێکی توندی بەرامبەری هەیە کە بووەتە نەزعەیەکی سایکۆلۆژی لەناخ و نەستیدا و ناتوانێت گوزەشتی بکات، چونکە زۆرێک لە بابەتەکانی ئەم کتێبە تەرخان کراوە بۆ وەڵامدانەوەی برایم جلال سەرەڕای ئەوەی مەلا بەختیار لەشوباتی ساڵی 2012 بەکتێبێک بەناوی ( چۆن چەپکێک و کام مێژووی کۆمەڵە؟! ) وەڵامی کتێبەکەی برایم جلالی داوەتەوە ، کە برایم جلالە ساڵی 2011چاپی کردوە، پێ دەچێت وەڵامەکانی مەلا لەو کتێبەدا ئاوی نەکردبێت بەناخی گڕگرتویدا و دڵی ئارام نەکردبێتەوە، یا هەندێک وەڵامی لە یاد چوبێت و لێرەدا فریا کەوێت و زیاتر داخی دڵی لەم کتێبەی تردا هەڵ ڕێژێت. چونکە برایم جلال جەلادی زیندانەکەی مەلا بووەو شانازی بە جەلاد بونیەوە کردوە و مەلا بەختیار وەک مراهقێکی سیاسی سەیر کردوە.

بەشی دووەم..

لەدوو بڕگەی جیاوازدا باری سەرنجم لەمەڕ کتێبەکەدەخەمە ڕوو،
یەکەم: هەندێک کتێبی مەلابەختیار و زۆربەی وتارەکانیم خوێندوەتەوە،،دیموکراسی لەنێوان مۆدێرنێتە و پۆست مۆدێرنێتە، یاخی بوون لە مێژوو، چۆن چەپکێک و کام مێژووی کومەڵە دواجاریش ئەم کتێبە، زۆرێکی تر لە بیرەوەریەکانم خوێندوەتەوە، سێبەرگی کتێبەکانی کاک نەوشیروان و( ٥ کتێبی بەدەم ڕێگاوە گوڵچنین) و لەنیوان مام جلال و من دا، هتد ، بەخەونی گەورەوە کەوتینە ڕێ فازل کریم ، ئەزمون و یاد، پشکۆ نجم الدین، بیرەوەریەکانم بهالدین نوری، ڕۆژژمێری پێشمەرگەیەک حەمەی حاجی محمود، ئەو ڕۆژانەی نیشتمان هی هەمووان بوو هەڤاڵ کویستانی، دیداری تەمەن سەلاح ڕەشید ،دەنگی خاک حەمەی حەمە سعید،،البارزانی والحرکە التحرریە الکردیە،مسعودبارزانی،،،هتد.


دەبێت بڵێم، مەلا بەختیار کەسێکی زیرەکە، بەڵام زیرەکی فۆرم و مۆدیل و ستایلی زۆرە، لەو بڕوایەدام لە قۆناغی منداڵیدا مەلا بەختیار بیخوێندایەو لە ئامێزی خێزانەکەی خۆیدا کەسایەتی پێبگەیشتایە مرۆڤێکی ئەکادیمی و کارەکتەرێکی تر دەردەچوو، بەڵام پێدەچێت لە ئامێزی خێزانی گەرم مافی نەدرابێت بۆیە کەسایەتیەکی شەپڕێو و شێواوی فیکری و شۆک ئامێز و گۆش کراوی دورلەسۆز، کارەکتەرێکی سەرسەختی ڕکابەرو یاخی لێ دروست کردوە !چونکە بەڕاستی قۆناغی منداڵی لەڕوی سایکۆلۆژیەوە کاریگەری گەورەی هەیە لەسەر فۆرمەلە بونی کەسایەتی منداڵ، ئەمە توانج نیە بەڵکو خوێندنەوەیەکی سایکۆلۆژی کەسایەتی مەلایە، بەهۆی مەحروم بون، عەوداڵی ناوبانگ و دەسەڵات و خواستی تۆڵە کردنەوەبووە. لەم میانەدا سەرنج لە کتێبەکەی بدە لێوانلێوە لە نەرجسیەت و خۆپەسەندی،لەناوبەندی هەڵەی گشتیشدا وەک تاکێکی هاوبەشی بڕیار ڕەخنە لەخۆی دەگرێت، ڕەخنەی لۆژیکی و نالۆژیکی لە زۆرینەی هاوەڵ و سەرکردەکانی یەکێتی و بگرە سەرکردە دیارەکانی کەمپی سۆسیالیزمیش دەگرێت، لەهەندێک بڕگەدا ، لاقرتی و سوکایەتی و جنێویش بەتایبەت بەرامبەر برایم جلال ڕیز دەکات، لەبارێکدا ئەم ڕەخنە گرتنانە دروست و پۆزەتیفن ئەگەر فۆرمی ڕەخنەی سیاسی و زانستی لەخۆ بگرێت، بەڵام ڕەخنەکان هەموو سنورەکانی ڕەخنەی سیاسی تێپەڕاندوەو هاوکات هەلومەرجی دەرکردنی کتێبەکە پاش ئاوابونی خۆری ژیانی هەندێکیان ناتەندروستە، چونکە ئەوان کاتێک لەژیاندا بون ڕاشکاوانە و بوێرانە و بێ سڵەمینەوە ،بۆچونیان خستوەتە ڕوو، هەروەها خوێندنەوەی ڕوداوەکانی ئەو قۆناغە و ڕەخنە لێگرتنیان پاش گەڵاڵە کردن و ئەزموونی تەمەنی ٦۰ ساڵانەی مەلا و تێگەشتنەکانی ئەمڕۆ ببەیتەوە بۆ ٤۰ ساڵ لەمەوبەرو بڵێیت پێشبینیەکانم کت و مت وا بون و وادەرچون، هەڵەیەکی ستراتیژیە مەلا تێیکەوتوە. چونکە لە حەفتاکاندا زۆرێک لەسەرکردەکان موراهق و هەرزەی فکری سیاسی بوون، ئەمەش نەنگی و توانج و لاقرتی نیە ،بەڵکو وەسفی حاڵەتەکەیە و هەر مەلا بەختیار وانەبووە ، بۆ نمونە چیرۆکێکی م، جەعفەر (فاضل کریم ) دەگێرمەوە کە لە کتێبی،بەخەونی گەورەوە کەوتینە ڕێ ولەلاپەڕە ۱۲۱ دا دەڵێت:جوتیارێکی هاوڕێم هەبوولە یەکێک لەگوندەکانی ئالان و سیوەیل ، بەناوی حەسەن، زۆرجار یەکترمان دەبینی و من باسی شۆڕشی نوێم بۆ دەکرد کە ئەمجارەیان وەکو جارەکانی تر نابێت هەژاران و نەداران رابەرایەتی شۆڕشیان دەکەوێتە دەست و ڕێگە نادرێت ئاغا و دەرەبەگ لەسەرەوەبن و ئەوان خاوەن دەسەڵات بن، لەمەودوا کەس ناتوانێت بەناوی شۆڕشەوە هەژارو ڕەنجدەر بچەوسێنێتەوە، ئەوەندەم ڕست کابرا بۆژوو بوو،بەدەستی ڕاستی کڵاوو جامانەکەی بەرەو سەرەوەبردو گوتی:(( ئای مامۆستا گیان! خۆزگە ئەوەندە کەرنەبویتایە! )

بەشی سێ یەم:

وەک گوتم مەلا بەختیار زیرەکە، خوێنەرێکی باشە، بەڵام بەهۆی دیارینەکردنی ڕشتەیەکی تایبەتی وبزری پسپۆری و نەبونی بڕوانامەیەکی ئەکادیمی کە میتۆدی نوسینی دیاری بکات وای کردوە زانیاریەکانی مەلا گشتی و ویکیپیدیایی ڕوکەش بن، واتە ستونی ناڕواتە ناخی بابەتەکان تەنها لەئاسۆیەکی دیاری کراودایە، ئەم ڕاستیەش کارەکتەرە ئەکادیمیەکان بەسانایی لەنوسینەکانی ناوبراودا دەیخوێننەوە و تێ دەگەن کە مەلا بەختیار نازانێت، بەڵام وادەزانێ دەزانێت!!، مەلا بەختیارقسە لەسەر زۆر ڕەهەندو بوارو بابەتی ئەبستمولۆژیی دەکات و دەنوسێت، فکر ،فەلسەفە، مێژوو، سیاسەت، هونەر،سۆسیۆلوژیا، ڕەخنە، لێکۆڵینەوە، فولکلۆر،سایکۆلوژیا ،ئەسنۆگرافیا،
ئەنسرۆپۆلۆژیا، هیۆمانیزم،ئیسلام ، ئیسلامیی سیاسی(عەولەمە ،،نوکتەکەی کاک نەوشیروانم بیرکەوتەوە!!! )
زیرەک لە مۆرفۆلۆژیا و ڕیزکردنی ئیدیۆم کەمانا نەدات بەدەستەوە،ئەمە دیارترین خاڵی لاوازی مەلابەختیارە، بۆنمونە لەم کتێبەدا و لەڕشتەی یەکەم و لەژێرتایتڵی فەلسەفەی سیاسی و سایکۆلۆژیەتی سیاسی ،بەگشتی ۷٤ لاپەڕەی تەرخان کردوە بۆ زۆربابەتی سایکۆلۆژی و ڕوداوی مێژووی لەمەڕ ڕق و کۆنژۆکتۆری توندو تیژی و فەلسەفەو سایکۆلۆژیەت و مێژوو...هتد، بەبۆچونی ئێمە ئەم پێشەکیە دورو درێژە بێزارکەرو ناپێویست بوو، ، دەکرا بەکورت و پوختی لەمەڕ ئەوبابەتە ویکیپیدیایی بنوسێت ،نەک ئەتناب و درێژدادڕی یەکی نازانستی بێهودە ،هەروەها مەلابەختیار لە پێشەکی کتێبی (چۆن چەپکێک و کام مێژووی کۆمەڵە) لەژێر تایتڵی... درۆو ..درۆی ململانێی سیاسی دەڵێت:( لەوباوەڕەدام جنێو چینە چەوسێنەرەکان دایانهێنابێ و درۆش چینە چەوساوەکان)، بەڵام مەلا بەختیار خۆیشی لەم کتێبەدا دەیان قسەی سوک(جنێوی سیاسی ) و لاقرتی و گاڵتەجاڕی بۆ برایم جلال ڕیز کردوە، کە نەدەبوو مەلا بکەوێتە ئەم تەڵەزگەیە کە خۆی گوتەنی سوتاوی دەستی ئەم نەهامەتیەیە، دەستەبژێرێک( من ناوی دەنێم لە قسە زبرە نەشیاوەکانی) نمایش دەکەین کە ئاراستەی برایم جەلالی کردوە:(نەخۆشی سایکۆلۆژی نەخۆشیە دەرونیەکانی قوڵ کردوە،چەشنی ئەفسەرە دڕندەکانی ئەمنی عێراق، چەقۆی ترسنۆکی برایم جلال،هاوهەڵوێستی سوکی وەکی خۆی،جەلاد، دڵڕەشەوەکوگەماڵی پۆلیس، شارەزاییان بوو لەماستاوکردن، ناجوامێری، دزیەکانیان و خۆفرۆشتنیان،ڕقاوی هەلپەرست،ئەوەندە بچوک و ئاستی کەسایەتی ئەوەندە نزمە ،لەکاتی جەلادیشدا ترسنۆک بوو،هەڵبەستچی،دڕدۆنگی دەرونی نوسەر،بێنەزاکەتی بێلەزەت،د.خدر پێی ڕابواردوە،وادیارە چیگواراجەلال سەنگەسەری لەچیگوارای کوباو بولیفیا مەترسیدار تربووە،ئەم کەسانەبخرێنە نەقاهەتگا شوێنی سۆزی دەرونی،درەختی زڕ،ئاژاوەگێڕ لەهەلپەرستە خەستەکانە، دەبوو وەکو شێت تەماشا کرابا،درۆکۆ، جەنەڕاڵ جەلال شەرمەزاری مێژوو،بەشەوارە کەوتوە لەترسا،بێچاوو ڕویشە،برایم شایەری پاساوەکان ،کەس هیچی نەکردە کڵاوەکەی...هتد ) هێشتا ماوەوهێندە بەس بێت،ڕیزکردنی ئەم جنێوانە گرێی دەرونیە و لەهەست و نەستی مەلا بەختیادا وەک کاردانەوە ڕەگی داکوتاوە ،کەواتە پێشەکی کتێبەکەی بەهەڵەو خەوش و ناتەوایەکانەوە کت و مت خۆیشی دەگرێتەوە!!!. بەڵام مێمڵ و نەیارە وەهمیەکەی مەلا بەختیار کە نەوشیروان موستەفایە، هەروەک چۆن لەسیاسەتدا کاریزمابوو، ئاواش لە نوسینەکانیدا ،لە ڕاڤە و لێکدانەوەکانیدا ڕیتم و مۆزیکایەکی تایبەت و سیحری بەیانی هەیە خوێنەرکێش دەکات وهۆگری نوسینەکانی دەبێت، نەوشیروان سیاسی و نوسەرو لێکۆڵەرو سۆسیۆلستێکی بەهرەمەندو ئینسایکلۆپیدیایەکی مەزنی شعری کلاسیکی دونیای هاوچەرخی کوردە، ئەمە شایەتی هەڵەبجەییەکە،نەگۆڕانە و نەئاش بووە نەجاش ، تەنها خوێنەرێکی هەردوکتان و ئامۆزای فاتحی شێخ حەیدەری یەکەم شەهیدی کۆمەڵەتانم و بەس..

بەشی چوارەم و کۆتایی
مەلا بەختیار دەڵێت:( بەندە لەساڵی ۱۹۷٦ وە، نەک هەرئاگام لەڕوداوەکانە، بەڵکو لەناو زۆربەی ڕوداوەکانیشدا بووم، ئەو کولتوری زەبرو زەنگەی لەلایەن و هێزە سیاسیە-عەسکەریەکان بەکارمان هێناو پاساوی ئایدیۆلۆژیمان بۆ دەهێنایەوە)( سەردارانی کوردستان لەگرتنەبەری شێوازی چەشناوچەشن بۆ گەیشتن بەمەرامە تایبەتی و گشتیەکانیان بەشێوەیەکی دواکەوتوانە بەڵکو بە لافلێدانی شۆڕشگێڕانەودیموکراسیانەش دوای ٥۰۰ ساڵ لەگۆڕانکاری میکیافیلییان تێپەڕاندوە ،کەچی بازرگانە شۆڕشگێڕەکان و هەلپەرستە هەڵپەچیەکان نیو سەدە زیاترە نەک لایەنی چاکە بەڵکو تاوان و تاڵانی ئەم سەردارانەش دەکەنە دەستکەوتی مێژوویی )، مەلا بەختیار زیاتر دەڵێت( لە شۆڕشی نوێشدا چ یەکێتی وچ پارتی،دوو هێزی بەدەسەڵات و بەزەبروزەنگ بون،تەنها ڕێگەیان بەولایەنە سیاسی-چەکدارانە دەدا لە سایەیاندا هەڵسوڕێن کە ترسیان لێیان نەبوو،ئەگینا لەهەر دەڤەرێک ترسیان لەهەرهێزێک پەیدا کردبێ ،لەسەر نفوزی خۆیان خەفەیان کردون،خەفە نەبوبن، توانیبێتیان سەرکوتیان دەکردن ) مەلا بەختیار توندتر دەڵێت (مام جلال لە هەڵسەنگاندنی هێزی پێشمەرگەی یەکێتیدابێهیوایی خۆی لەو هێزە خستەڕوو،بەشڕە خۆروتاڵانچی ناودێری کردن.ئەو نمونەی شەڕی بێتواتەی هێنایەوە و هەموو لێپرسراوەکانی بەدز لە قەڵەم دان.ئەو بە شیعرە ناودارەکەی شاعیری عەرەب موزەفەر نەواب، ئاماژەی بەو لێپرسراوانە کردو گوتی:هیچ کامێکتانی لێ نابوێرم،ئەمە لەشکری هۆلاکۆیە نەک لەشکری ڕزگاریی کوردستان من بەچاوانی خۆم ،سەلاجەو موجەمیدەم بەکۆڵی مەسئولەوە بینیوە! ل۳٨۰) کاک سەڵاح ڕەشید لە کتێبی شەڕی ناوخۆی کورد ،دەڵێت (هەردوهێزی سەرەکی،ویستویانە خۆیان باڵادەستی سیاسی و سەربازی بن و گەورەترین ناوچەی جوگرافییان لەژێر دەسەڵاتدا بێت،ویستویانە ئەوان براگەورەو ساحێب ماڵ و هێزەکانی تر میوان و گوێگر و جێبەجێکاربن....ئەم عەقڵیەتە زەمینەی بۆ شەڕی ناوخۆ زۆرئاسانکردوە،لەبەر ئەوەی هەریەکەیان شەرعیەتی شۆڕشگێریان لە فکری خۆیاندا دروستکردوە.... )مامۆستا جەعفەر هاوڕێی منداڵی مەلا بەختیار لە کتێبی بەخەونی گەورەوە کەوتینە ڕێ دەڵێت:(میکیاڤیلییەکانی ئێرە حەوت بەردیان بەپشتی ئەودا داوە..ئەمڕۆ لەسەر دینێکن سبەی دژی ئەو دینەن،، هەریەکەیان لە چل ئاوی داوەو قولەپێی تەڕ نەبووە،،،ئەمانە گرەویان لەشەیتانیش بردوەتەوە،،،تازەم زانیوە هەمویان پەپولە بون...نەزیانیان بەکەس گەیاندوەو نەلە پشتەوەخەنجەریان لەکەس داوە،....هەروەها دەڵێت..کاکم مامۆستا غاندی نیو سەدە لەمەوپێش پێیگوتم،، بەشێک لەسەرکردەسیاسیەکان کەللەسەری شەهیدەکان دەکەنە پردێک بۆ ئەوەی بەئامانجەکانیان بگەن)
ئەو ئاڵای شۆڕشەی مەلا بەختیار بەشان و باڵیدا هەڵدەدا، پشکۆ نەجمەدین لە ئەزمون یاد دەڵێت،ئەو ئاڵای شۆڕشەی دوو ساڵ و نیو ی زیندانی و دەردی سەری لەسەرچەشت سەرکردەکانی کە قاپێک یاپراخ بەشیاندەکات، سەیردەکات پێکەوە نایانکرێت و هەریەک لە ئاوازێک دەخوێنێت.
ڕاست دەکەن ،هەموتان ڕاست دەکەن، مەلا بەختیار ڕاست دەکەیت و خراپتریش کراوە، ئێوە وەهمتان فرۆشت شۆڕش تراویلکەو سەرابێک بوو ،هەموتان، کەستانی لێ نابوێرم لەشکری هۆلاکۆ(خۆتان دەیلێن!! ) هەموو عاشقی کورسی و پلە و پۆست و پارەو دەسەڵاتن و هەریەکە پشکی خۆیی لە کێکەکە دەوێت، شەو و ڕۆژ بازرگانی بەخوێنی شەهیدانەوە دەکرێت، پاش ئەم کتێبە وئەو پەرەگرافانەتان بەگشتی، چیتر هەڵەیە لەستایشی دەسەڵاتی کوردی و باسی شۆڕشگێری و دیموکراسی و مەدەنیەت و مافی مرۆڤ بێنە گۆ، ئەبێ باسی دروێنەی تاڵ بکرێت، باسی هەژاری،برسێتی و نەخۆشی و تاوان و بەڵتەجێتی و غەش و درۆ و دەستبڕین و ساختەچێتی و کوشتن و ڕاوەدونان بکرێت؟!چیتر هەڵەیە باسی زانست ، کولتور، ئازادی و ئازادی ڕادەبڕین و مافی مرۆڤ و مەدەنیەت هاوڵاتی بون بکرێت ، باسی هەڵبژاردن و ئاڵوگۆڕی ئاشتیانەی دەسەڵات نەکرێت!! هاوڵاتیەک کە داوای مافێکی ئاسایی و ژیانێکی کارامە و پڕ کەرامەت دەکات ، داوای موچە سەرەتایترین مافی ژیان دەکات! زیندانی دەکرێت، ناتوانن باسی سبەی و ئایندە بکەن و روئیاتان ڕۆشن نیە و پلانتان نیە،هەمیشە لەگەڵ ڕەوتی ڕوداوەکاندا ڕەدوکەوتەن ،باسی مافی خێزان و ماڵباتی شەهیدەکانم بۆ بکە! دایکی جەرگ بڕاو و باوکی دڵقرچاو ئافرەتی بێوەژنکراو و منداڵی بێنازکراوی دەستی شوڕشەکانتانمان بۆبکەن! !! باسی کۆمەڵەو کۆمیتەی هەرێم و ئاڵای کام شۆڕشم بۆ ئەکەیت ؟! هاوڵاتی ڕاکەڕاکەو هەپرون هەپرون بوە لەپێناو دابین کردنی پارویەک نان بۆ منداڵەکانی!! باسی بەها و پرەنسیپ و مۆرال نەکرێت کە بووەتە مادەیەک بۆ بازرگانی و سازش و موزایەدە، چیترباسی کام شۆڕش و کام کوردستان دەکرێت؟ ئەوکوردستانەی سنور و توخوبی دیارنیەو هەڕۆژەی پارچەیەکی دەخرێتە موزایەدەی فرۆشتنەوە، کام وڵات و داگیرکەر زیاتر ئەدات؟ یا ئەو کوردستانەی لەخەیاڵی شاعیرەکاندا هەیە؟! بۆیە دەبێت هەمیشە ڕیستارت بکەین! و نوقتەو سەری دێڕ و دوبارە دەست پێبکەینەوە، ناتوانن باسی ئەمانەو زۆر شتی تریش بکەن ؟هەش بەسەرهەموتان، لیبرالی، عیلمانی، سۆسیالیزمی، ئیسلامیی،نەتەوەیی، جاش و پاشماوەی بەعس، ڕاستڕەو و چەپڕەو،تەونی کاکڵەمووشن و هیچی تر،
ئەگەر سبەی گڕکانێکی سیاسی یا زەمینلەرزەیەک بدات لەکوردستان و لەگەڵ زەویدا تەختی بکات کێ هەیە بۆمان بگری؟ کێ لە نێو مرۆڤایەتیدا یادی خێر و بیری نەتەوەی کورد دەکات؟ ئێمە چیمان پێشکەش مرۆڤایەتی کردوە؟ هیچ!! ئێمە وەک کورد هیچ نین!! سفری دوای فاریزەین، بگرە سفرێک لەدەستە چەپی ژمارەکان، عالەین بەسەر بەشەریەتەوە، بەداخەوە قەدەرمانە دەبێت هەموو نەوەکانمان لەسفرەوە دەست پێبکەنەوە، ئەبێ ئەوەی ئێوە کردوتانەو ئەنجامتان داوە بەلاستیکێکی پیس بیکوژێنینەوە و دوبارە چەرخی گەردون بخەینەوە گەڕ، وەهەرکاتێک دەرچەو دەرفەتێکمان بۆ هەڵدەکەوێت بەهۆی سەرکردەی ئانارشیستەوە بە سەفسەتەو چەلەحانێی بێهودە لێی دەدەرێت و ئاشبەتاڵی پێ دەکرێت! ! شۆڕشەکەتان تەونی کاکڵەموشان بوو بۆیە دروێنەکەتان تاڵە .چاودێران دەزانن پاش دوا کۆنگرەی یەکێتی ئێوەبە وەرزو تێرمی دووەمی ئاڵای شۆڕشدا گوزەر دەکەن، بەڵام کەمێک هێوری... و ....دووبارە نوقتە سەری دێڕ !!!!!

وتارەکانی تری ئەم نوسەرە
یاسین ڕەسول عوسمان
سەما کردن لەگەڵ گورگ
یاسین ڕەسول عوسمان
کۆمەڵگەی شڵەژاو
یاسین ڕەسول عوسمان
لەنێوان فۆرم و شوناس گۆڕین
یاسین ڕەسول عوسمان
هەولێر تەنها نیە!
یاسین ڕەسول عوسمان
دیارە بەغدا خۆشە !
یاسین ڕەسول عوسمان
کورد بوون و کوردایەتی
یاسین ڕەسول عوسمان
درۆ،دەروازەی بێ متمانەیی...
یاسین ڕەسول عوسمان
ڕیسکی زەنگی گەشتەکەی کازمی
یاسین ڕەسول عوسمان
خەمێک بۆ پەروەردە

بابەتی زیاتر

سەرجەم مافەکانی پارێزراوە KNA . Copyright 2020 - Knanews.net ©