قاسم ئەعرەجی، راوێژكاری ئاسایشی نیشتمانی عێراق، راپۆرتی سەرەتایی لێكۆڵینەوەی لەهێرشەكەی سەر ماڵی مستەفا كازمی، سەرۆك وەزیرانی عێراق ئاشكراكردو رایگەیاند، ماڵەكەی كازمی بە دو بۆمب كراوەتە ئامانج كە یەكێكیان نەتەقیوەتەوەو لەكاتی هێرشەكەشدا مستەفا كازمی لە ماڵەكەیدا بوەو ژیانی ئەو كراوەتە ئامانج.

قاسم ئەعرەجی لە كۆنگرەیەكی رۆژنامەوانیدا رایگەیاند، هێرشەكەی سەر ماڵی سەرۆك وەزیران بە دو فڕۆكەی بێفڕۆكەوان ئەنجامدراوەو دو بۆمبیان خستۆتە خوارەوە یەكێكیان بەر سەربانی ماڵەكەو ئەویدیكەیان كەوتۆتە حەوشەكەی، یەكێك لە بۆمبەكان تەقیوەتەوەو ئەویدیكەیان نەتەقیوەتەوە.
ئاماژەی بەوەشدا كە دو تیمی پوچەڵكردنەوەی بۆمب و بەڵگەی تاوان نێدرانە شوێنی روداوەكەو جەختیشی كردەوە كە هێرشەكە ژیانی سەرۆك وەزیرانی عێراقی كردۆتە ئامانج.
ئەوەشی وت، سەرمان سوڕما كاتێك ئەو دو تیمەی سەر بە پوچەڵكردنەوەی بۆمب و باڵگەی تاوان، ئەو بۆمبەیان تەقاندەوە كە نەتەقیبوەوە بەبێ وەرگرتنی زانیارییەكان، بۆیە لیژنەی لێكۆڵینەوە بڕیاریدا بە زیندانیكردنی ئەو دو تیمەو لەوبارەیەشەوە لێكۆڵینەوەكان بەردەوامن.
جەختیشی كردەوە كە لیژنەكەیان بەبێ هیچ گوشارێك ئەركەكانی خۆی بەجێدەهێنێت.

ئاماژەی بەوەشدا لیژنەی لێكۆڵینەوە تاكو ئێستا هیچ كەس و لایەنێكی تۆمەتبار نەكردوە لەسەر هێرشەكەو لێكۆڵینەوەكان پێویستیان بە كاتی زیاترە.

بەپێی قسەی ئەعرەجی، دو فڕۆكە بێفڕۆكەوانەكە لە باكوری رۆژهەڵاتی بەغدا نیشتونەتەوەو شوێنی هەڵسانیشیان دیاریكراوە.

هێمای بۆ ئەوەش كرد كە تاوەكو ئێستا لیژنەی لێكۆڵینەوە بۆ لێكۆڵینەوەكان پشتی بە هاوكاری هیچ لایەنێكی بیانی نەبەستوە، بەڵام بۆ لەمەودوا پشت بەستنی بە توانای وڵاتانی دۆست بۆ ئاشكراكردنی راستییەكان بەدور نەزانی.

ئەعرەجی وتیشی، لەكاتی هێرشەكەدا كازمی لە ماڵەكەیدا بوەو دوای تەقینەوەكە گوازراوەتەوە بۆ شوێنێكی پارێزراو. وتیشی، نێوانی بۆمبی یەكەم و دوەم، پێنج مەتر بوەو شوێنی چونەدەرەوەو شوێنی دانیشتنی مستەفا كازمی، سەرۆك وەزیرانی عێراقیان كردۆتە ئامانج.
زۆرترین خوێندراو

بابەتی زیاتر

سەرجەم مافەکانی پارێزراوە KNA . Copyright 2020 - Knanews.net ©