ماوەی سێ رۆژ خوێندکارانی سنووری پارێزگای سلێمانی و ئیدارەکانی گەرمیان و راپەڕین خۆپێشاندان دەکەن و داوای گەڕاندنەوەی دەرماڵەکانیان دەکەن. ئەمڕۆ لە هەولێریش خوێندکاران گردبوونەوە. بەشێک لە خوێندکاران لە سلێمانی چەند رێگەیەکی سەرەکییان داخستووە کە بەشێکیان رێگەی نێوان شارەکانن.

لە بەردەم کەمپی نوێی زانکۆی سلێمانی، خوێندکاران رێگەی سەرەکیی سلێمانی - کەرکووکیان داخستووە. لە چەمچەماڵیش خوێندکاران رێگەی شارەکە بۆ کەرکووک و هەولێریان داخستووە. لە گەرمیانیش خوێندکاران رێگەی سەرەکیی کەلار - سلێمانیان داخستووە. 

خوێندکاران درووشمی جیاواز لە خۆپێشاندان و گردبوونەوەکانیان دەڵێنەوە، بەڵام دیارترینیان داواکردنی دەرماڵەیە. دەرماڵەی خوێندکارانی زانکۆ و پەیمانگەکان تاوەکو ساڵی 2014 دابەشدەکرا کە بڕەکەی بۆ خوێندکارانی دەرەوەی ئەو شارەی کە دەوامییان تێدا دەکرد، ئەگەر بەشەناخۆییان وەرنەگرتبووایە 100 هەزار دینار، ئەگەریش بەشەناوخۆییان وەرگرتبووایە 60 هەزار دینار بوو، هەروەها بۆ خوێندکارانەی کە لە شارەکانی خۆیان دەوامییان دەکرد 40 هەزار دینار بوو.

خوێندکاران لە راپەڕین و هەڵەبجە و کۆیەش گردبوونەوەیان دەستپێکردووە. ئەو خوێندکارانەی لە هەولێر گردبوونەوە لە راگەیێندراوێکدا ئاماژەیان بەوە کرد، داوای ئەوان تەنیا دەرماڵەیە و دەشیانەوێت لە گرژی و تووندوتیژی دووربێت. هاوکات سەرکۆنەی رووداوەکانی دوێنێی سلێمانییان کرد. نوێنەرەکەیان کە قسەی کرد ئاماژەی بەوە دا "چەکی ئێمە قەڵەمە" و هێزە ئەمنییەکانیش کەسوکاری ئەوانن بۆیە نایانەوێت گرژی دروست ببێت.

بابەتی زیاتر

سەرجەم مافەکانی پارێزراوە KNA . Copyright 2020 - Knanews.net ©