عەلی حەمەساڵح، ئەندامی پەرلەمانی کوردستان رایگەیاند، پرۆژەیەکی پێشکەشی ئەنجومەنی وەزیران کردوە بۆ کەمکردنەوەی نرخی بەنزین، ئەگەر حکومەت کار بە پرۆژەکە نەکات و رێکاری پێویستە نەگرێتەبەر لە دو هەفتەی داهاتودا نرخی یەک لیتر بەنزین بەرزدەبێتەوە بۆ هەزار و 300 دینار.

عەلی حەمەساڵح ئەمڕۆ لەمیانی کۆنگرەیەکی رۆژنامەوانیدا رایگەیاند، "ئەو مەترسییەی کە ئێستا دەستیپێکردوە کە پەیوەندی بە گرانتربونی نرخی گازوایل و نەوتی سپی و ئێل پی جی غازەوە هەیە لە ماوەکانی رابردودا چەندین جار بە یاداشت و لێکۆڵینەوە داومەتە ئەنجومەنی وەزیران، بەڵام تا ئێستا بە قسەمان نەکراوە، بە شاهێدی ئێوە و خەڵکی کوردستان ئەگەر ئەم پلانە جێبەجێ نەکرێت کە هیچ تێچویەکی دارایی لەسەر حکومەت ناکەوێت نرخی بەنزین، کازوایل، گاز و نەوتی سپی بەشێوەیەکی زۆر بەرچاو گران دەبێت".


ئاماژەی بەوەشکرد، 70% بەنزینی کوردستان لە ئێرانەوە دێت، ئێستا ئێران بەهۆی ئەو دۆخە تایبەتەی کە هەیەتی بەنزین، نەوتی سپی و کازوایل لە ئێرانەوە بۆ کوردستان رادەگیرێت، ئەوەی کە دێت کۆمەڵێک مەوادی پترۆکیمیایی مەترسیدارە، لە کۆمەڵێک پاڵاوگەی بێمۆڵەت تێکەڵ دەکرێن و کە مەکینەی ئۆتۆمبێل تێک دەدات و بە گرانیش دەفرۆشرێت، ئەگەر ئێستا بە 800 دینار بفرۆشرێت لانیکەم دەبێت بە هەزار و 100 دینار، ئەگەریش ئەم پڕۆژەیە جێبەجێ نەکرێت ئەوا نرخی یەک لیتر بەنزین دەبێتە 1300 دینار.

عەلی حەمەساڵح باسی لەوەشکرد، "ئێستا کە نرخی یەک بەرمیل نەوتی خاو زیاترە لە 80 دۆلار، لە یەک بەرمیل نەوت 30 دۆلار دەمێنێتەوە بۆ خەزێنەی حکومەتی هەرێم، بە 11 دۆلار کەمتر لە نرخی خۆی دەفرۆشرێت، 58% بۆ خەرجی دەڕوات، لە هیچ کوێیەکی دونیا نیە ئەگەر نەوتی خاو و پاڵاوگەت هەبێت، نەوت نەپاڵێویت بچیت لە دورترین شوێنی دونیاوە بەنزین بهێنیت، کە تێوچوی گواستنەوە و گومرگ و قازانجی پاڵاوگەو بازرگان دەچێتە سەر کە ئەنجامەکەی ئەمەیە، ئێستا پاڵاوگەی بازیان (قەیوان) رۆژانە توانای 35 بۆ 40 بەرمیل نەوتی هەیە بۆ عێراقی دەپاڵێوێت، واتا عێراق نەوتە خاوەکەی دەداتێ و بۆی دەپاڵێوێت، بەڵام حکومەتی هەرێم ئامادەنیە نەوتەکەی بداتێ، پاڵاوگەی کار بە تەنیا دەتوانێ 85%ی پێداویستی کوردستان دابین بکات کە توانای پاڵاوتنی 175 هەزار بەرمیل نەوتی هەیە".

وتیشی، "ئەگەر حکومەتی هەرێم خۆی نەوت بپاڵێوێت ئەوا دەتوانێت بە کوالێتییەکی باش و بەنرخێکی کەم بەنزین بداتە هاوڵاتیانە، نەک ئەو کوالێتییە ژەهراویەی کە دەهێنرێت". 

بابەتی زیاتر

سەرجەم مافەکانی پارێزراوە KNA . Copyright 2020 - Knanews.net ©